Category: Albisteak

Premiazko deritzogu Sustraiak Fundazioaren gaineko komisioa sortu eta deitzeari. Fundazioak 2009tik hona 1,28 milioi jaso ditu subentzioetan

Mar 28 2014

“Maila politiko, tekniko eta fundazioaren patronatua osatzen dutenen ardura guztiak, azken ondorioetaraino, garbitu nahi ditugu”, esan du Eneritz Amezketak, koalizioaren bozeramaleak.

  • Auditoria batek gastu bikoiztuak azaleratu ditu baita udaletxeareki egindako hitzarmenen ondorioz, sarrera moduan aurkeztutako kopuruekin bat ez datozen fakturak ere.
  • Fundazioaren patronatuko udal ordezkarien aldetik, Fundazioaren jardueren gaineko kontrol politikorik eza izan dela ondoriozta daiteke.

Premiazko deritzo udal komisioa sortzeari, Sustraiak Fundazioaren funtzionamendua aztertzeko, 2009tik hona 1.280.619,45 euro jaso dituena subentzio publikotan. 2009an bertan jaio zen Fundazioa, bere estatutuen arabera, “euskal kultura eta euskara Basaurin sustatu eta zabaltzeko”.

P1010031

Eskaera, martxoaren 7an erregistroan sartu zena eta oraindik Udaleko Gobernu taldearen onarpenaren zain dagoena, Basauriko udaletxean gaur egindako prentsaurrekoan arrazoitu dute Eneritz Amezketak, Jabi Vallek eta Zigor Isuskizak, EH BILDUko ordezkariek.

Prentsaurrekoa egiteko erabakia hartu genuen, Sustraiak Fundazioaren 2010 eta 2011 urteetako jarduera eta diru-kontuen gainean egindako auditoriaren emaitzak jakin ondoren. Bertan, dudak azaleratzen dira, gardentasunari eta aurrekontuetako diruaren azken helburu zehatzari dagokienez. “Auditoria hau legegintzaldi honen hasieran eskatu zuen koalizioak, fundazioak sortarazten zizkien zalantzak zirela eta. Eskaera honi gehitu zitzaion, urtero hitzartutakoarentzat diru gutxiago esleitzeko eskatzea” azaldu du Eneritz Amezketak.

Esleitutako diruaren zati handi bat, 200.000 euro inguru 2010 eta 2011 urteetan soilik, TXG Consulting enpresara joan da, Fundazioaren kudeatzaile kontzeptuko gastuetan egindako lanagatik, txostenak prestatzea barne.

Aurreko urteetako auditoriak ere eskatu dizkiegu udaleko arduradunei, oraindik bat ere helarazi ez dizkietela.

“Gure dudak areagotu dira Sustraiak Fundazioko burua den Merkat Bernaolaren adierazpenak entzun ondoren, Euskara eta Politika Kulturaren komisioan otsailaren 25ean egindakoan. Izan ere, “subentzio publikoen diruaren xedea azaldu baino, zalantza gehiago ekarri baitzituen fundazioaren gestio ekonomikoari buruz” Jabi Valleren aburuz. EH Bilduko ordezkariaren iritziz “euskararen defentsa bat etorri behar da gardentasunarekin eta diru publikoaren erabilera
egokiarekin”.

Jabi Valleren ustez, “zalantza handiak ditugu Sustraiak Fundazioaren funtzionamenduaz eta finantziazioaz, aipatutako auditoria aztertu ostean, azterketa hauen gauzatzean eskarmentua handia duen enpresa independente batek egindakoa”. “Auditoria enpresa hau Basauriko Udalak ere antzeko lanak egiteko kontratatu izan du lehenago ere, lan profesional eta zorrotza eginez.

“Sustraiak Fundazioaren auditoria egiteko garaia heldu eta horko buruek txarto eginda dagoela esan… Kasualitatea da gero!” adierazi du Jabi Vallek.

Ekintza Plana eta dietak

Sustraiak Fundazioak 2010 eta 2011 urteetan burututako jardueraren alderdi ilunenetako batek zerikusia dauka kontratazioekin eta ekitaldi horietan antolatu ziren hainbat ekintza kulturaletarako esleitutako dieten ezartzea eta kopuru ekonomikoarekin. “Ez dakigu dietetarako kopuru ekonomikoa erabakitzeko irizpidea zein izan zen ezta nork erabakitzen zuen ere eta, udalekuei dagokienez, ez dakigu zenbat umek hartu duten parte zehatz-mehatz eta zenbat kobratu zaion bakoitzari bertan parte hartu ahal izateko” planteatu du Zigor Isuskizak. Fundazioak, 14.500
euroko aurreikuspena ere eginda izan du azpiegitura informatikoetarako eta, gaur egun euren web orria ez dabil”.

Auditoriak “akats larriak eta kezkatzeko modukoak” azaleratu ditu, Isuskizaren iritziz, “Balantze Ekonomiko berean, jarduera bereko gastu bikoiztuak edo hainbat ekintzatan sartuta, Balantze berean sartuta eta egindako fakturen eta hitzarmenetatik eratorritako sarrerei dagozkien aurkeztutako kantitateen arteko diferentziak”.

“Dauzkagun beste duda batzuk dira ea nork eta non erabakitzen den Sustraiak Fundazioaren Jarduera Plana, urteroko auditoria egin behar zaiona, eta zergatik ez diren inoiz aurkeztu fundazioaren memoria tekniko eta ekonomikoak”, erantsi du gure ordezkariak.

Kontrol eta erantzukizun politikoa

Azkenik, gure ustez, beharrezkoa da Udal agintarien eginkizuna ere argitzea Sustraiak Fundazioaren patronatuan, Eneritz Amezketaren iritziz “berauek izan beharko liratekeelako kontu horien jarraipenaren eta diru publikoaren erabilera egokiaren bermatzaileak ”.

“Zentzugabekeria kontable hauez gain, egunotan hitzarmena eta bertan adostutakoa aztertzen aritu izan gara eta jakin ahal izan dugu fundazioak eratu beharko lukeela Jarraipen Batzorde Mistoa, Alkate andreak (sinatu zen garaian) eta beste lau kidek osatua, bi Basauriko Udalaren ordezkari bi eta fundazioaren beste bi ordezkari” azpimarratu du Amezketak. “Bada, – gaineratu du – egin badira ez digute inoiz batzar horien berri eman izan, ezta urteroko Jarduera Planarena ere eta, gainera, bilera horietara ordezkari politiko bakar ere ez dela joaten jakin ahal izan dugu”.

“Laburbilduz, irregulartasunak eta kontrol politiko falta bistakoak dira, eta, horregatik guztiagatik, fundazioaren jardueraren gaineko ikerketa komisioa eratzeko arrazoi nahikoa dagoela uste dugu, sortu zenetik, diru publikoko milioi bat euro baino gehiago kudeatu duena. Eta, aldi berean jakina, azken ondorioetaraino garbitu maila politiko, tekniko eta patronatua osatzen dutenen ardura guztiak”, gehitu du koalizioaren bozeramaleak.

Hau guztia kontuan hartuta, Basauriko EH Bilduk eskatu du premia handiz Ikerketa Udal Komisio sortzea, bertara joateko eskatuz auditoria egin duen enpresa, udal kontu-hartzailea, Merkat Bernaola, Sustraiak Fundazioko burua, TXG Consulting enpresako arduraduna, Loly de Juan PSE-PSOEko Alkate-Andre ohia eta egungo zinegotzia, Andoni Busquet (EAJ-PNV), egungo Alkatea eta Sustraiak Fundazioaren Jarraipen Batzordeko Udaletxeko ordezkariak.

Eaj-pnvk ez du erantzuten, ezta basaurin gizarte laguntzak aztertzeko komisioa deitu ere

Mar 21 2014

Arazo ekonomiko handiak edo esklusio arriskuan egon daitezkeen Basauriko herritarrok, errazago eskuratu ahal izango dituzte gizarte laguntza indibidualak EH Bilduk egindako proposamen bati ezker, nahiz eta aztertzeko bidean egon oraindik, Gizarte Ekintza udal komisio batean eztabaidatu eta onartu behar dena, Asier Iragorrik (EAJ-PNV), presidente eta zinegotzi delegatua denak, deitzen ez duena.

Asier Iragorrik dagoeneko deitu behar izan du arestian aipaturiko bilera, behin berak Gizarte Laguntza Indibidualen gaineko Oinarri Arautzaileak aztertzeko, eskatutako 15 egunak joan eta gero, EH Bilduk aurkeztu zuena, udal arlo honetan egindako azken komisioan.

EH Bilduren proposamenak orain arte egon den ebazpena ordeztu eta laguntza hauek jasotzea erraztu nahi du jende gehiagok lortu ahal izateko. Proposamen hau, gainera, EAJ-PNVk eskaintza egiteko agindu baino hiru hilabete geroago aurkeztua izan da.

Basauriko EH Bilduren ustez, Asier Iragorriren jarrera oztopatzailea mesprezua eta aipatutako komisio horretako partaideekiko errespetu falta da. komisio horretan adostatutako erabakiak etengabe ez betetzea ere salatu nahi dugu, baita EAJ-PNVren Gobernu-taldearen borondate negoziatzaile politiko eskasa ere.

Gobernu taldeari, beraz, premia handiz komisioa deitzeko eskatzen diogu, beronetan parte hartzen duten kideei ez ezik, Basauriko herritarrei ere, batez ere, errespetua erakutsiz. Izan ere, eurak baitira krisi ekonomiko honen ondorioak modu larriagoan pairatzen dabiltzanak eta mahai gainean daude urgentziazko gizarte laguntza ez-ohikoak, jende askorentzat, ezinbestekoak.

Nahiz eta gure herriko hainbat lagunek jasaten duten egoera ekonomikoa oso larria izan, iaz laguntza hauek bederatzi lagunek soilik eskuratu zituzten. Arrazoia izan zen, informazio faltaz gain, jeltzaleek egindako proposamena oso murriztailea izan zela eta kanpo uzten zituen basauriar asko eta asko.

EH Bilduren ekimenari ezker, eskaerak urte osoan sartu ahal izango dira Basauriko Udalaren Erregistroan eta azkar bideratuko dira. Laguntza hauen kopurua orotara, urtero 250.000 euro gutxienez izango da.

Gizarte laguntza hauek zertarako?

  • Ezinbestekoak diren gastuetarako (janaria, arropa, oinetakoak, garraioa, jantokia, zaintzaileak, eskolaz kanpoko ekintzak…).
  • Inserzio sozial edo arlo sozio-laboraletik eratorritako gastuetarako (matrikulazioak, materialak, bidaiak, gurasoek lan-ekintzetan edo formatzaileetan parte hartuz gero, haur-eskoletan eskolatzeagatiko gastuak…).
  • Etxe-kaleratzeak geldiarazi edo atenditzeko gastu beharrezkoetarako, etxea izateko sarbidea errazteko gastuetarako, urgentziazko aldi baterako ostatu-gastuetarako…).
  • Beste Elkarte Autonomo edo Estatu batera leku-aldatze gastuetarako.
  • Beste edozein behar ekonomikotarako.

Prentsa Oharra: Basauriko EH Bilduk Sustraiak Fundazioari buruzko ikerketa-batzordea egitea eskatu du

Mar 07 2014

Auditoria baten bitartez, balizko irregulartasun batzuk antzeman ondoren, Basauriko EH Bilduk udal batzorde baten sorrera eskatu zuen atzo Udaletxeko erregistroan sartuz, Sustraiak Fundazioaren funtzionamendua ikertzeko, 2009an sortu zenetik, hainbat subentzio publiko jaso duena.

Eskaeraren arrazoia sortu da, Sustraiak Fundazioak 2010ean eta 2011n egindako ekintza eta diru-kontuen gaineko auditoria baten emaitzak jakin ondoren, aipatutako auditoriak aurrekontuan esandako diruaren azken xede zehatzaren gaineko dudak islatzen baititu. Diru-laguntzaren zatirik handiena, 200.000 euro inguru, 2010ean eta 2011n soilik, zuzen joan da TXG Consulting enpresara, Fundazioaren kudeitzaile moduan egindako lanaren kontzeptuan, txostenak egitea barne.

2010 eta 2011n Sustraiak Fundazioaren jardueraren beste arlo ilunetako bat da, ekitaldian zehar, egindako kontratazio, eta dieten izendatze eta kopurua, ekitaldian zehar egin diren ekimenetan.

Basauriko EH Bilduk aurreko ekitaldietako auditoriak eskatu dizkie udaleko arduradunei, oraindik bat ere eman ez dizkigutenak.

Beste alde batetik, gure koalizioak Sustraiak Fundazioaren Patronatoan udal arduradunen eginkizuna argitu nahi du, berauek baitira diru publikoaren erabilera zuzenaren bermatzaile eta diru-kontu horien segimendua egin behar dutenak.

Sustraiak Fundazioa 2009ko maiatzean sortu zen, “euskal kultura eta euskara Basaurin sustatu eta zabaltzeko”, baina bere baitatik kanpo utziz, Basaurin hainbeste urtez gure hizkuntzaren alde egindako elkarteak, Euskarabila edo Bolintxu AEK, kasu.

EAJ-k EH Bilduri informazioa izkutatu dio Musika Eskolako kontratuen inguruan

Ots 08 2014

Basauriko EH Bilduk musika eskolako ikasleen hizkuntz eskubideak bermatzen ez dituzten baldintza pleguen gardentasun eta parte-hartze falta salatu nahi du.

Basauriko Udal Gobernu Taldeak (EAJ-PNV) duela urtebetetik hona entzungorrarena egin du, EH Bilduk, Udal Musika Eskolako langileak kontratatzeko prozesuan modu aktibo, publiko eta gardenean parte hartzeko eskaerak egin dituenean. EH Bilduren helburu nagusia Musika Eskolako ikasleen hizkuntz eskubideak
bermatzea izan da.

Gardentasuna eta parte-hartzerako emandako hitza bertan behera utzi eta gero, EAJ-PNV-k Musika Eskolako kontratazio prozesua, EH Bilduren ekarpen eta iradokizunak kontuan hartu gabe aurrera eramatea erabaki du. Hori horrela, berriro ere, Gobernu Taldeko arduradunen engainua pairatu behar izan du EH Bilduk, bereziki, Euskara Arloko delegatua den Nora Peredaren aldetik.

Plegu berrietan aurrera pausuak eman badira ere (langile berririk kontratatu beharko balitz euskararen ezagutza egiaztatu beharko litzateke. Orain arte, plantilaren %33ari baino ez zitzaion eskatzen euskara jakitea, eta oraingoan subrogatuta daudenak behartuta egongo dira euskararen ikaskuntzan aurrera egitera),Basauriko EH Bilduren ustez oraindik ere hizkuntz eskubideak bermatzetik urrun gaude, eta 86/1997 dekretuak ezartzen duenari bizkarra eman zaio.

Egoera honen larritasunaren berri emateaz gain, EH Bilduk salatu nahi ditu Euskara Arloak, eskatu diogun informazioa emateko ipini dizkigun zailtasunak, eta batez ere, prozesu osoan zehar egondako gardentasun eta parte-hartze falta, EH Bilduk, oposizioko indar moduan, gobernu taldearen lana kontrolatzeko egiten duen lanarekiko mespretxua azalduz.

Basauriko EH Bilduk,aukera hau aprobetxatu nahi du Musika Eskolako langileek egiten duten lan pedagogikoa eskertzeko, hala nola, hizkuntz normalizazioaren alde egin duten ahalegina, gure udalerrian euskararen alde antolatu izan diren ekimenetan parte hartuz.

2013ko martxotik

Basauriko EH Bildu-k azpimarratu nahi du, Euskararen Aholku Batzordean, Musika Eskolako langileen kontratazio prozesua zuzentzeko eskatzen aritu dela 2013ko martxotik. Eskakizun hau kexa bilakatu zen iazko azaroan, eskolako memoria aurkeztu zenean, Nora Peredak orduan jakinarazi baitzuen indarrean dagoen kontratuari amaiera eta lizitazio berri bati hasiera emango zaiola.

Panorama honen aurrean, Basauriko EH Bilduk zerbitzuaren errebertsioa eskatu nahi du eta Musika Eskolako kontratuak Lanpostuen Zerrendan sartu daitezela, eta beharrezko balitz, horretarako bidean, behin behinean plegu berriek 86/1997 dekretuak ezartzen dituen betebeharrak kontuan izatea, musika eskola ikasleen hizkuntz eskubideak bermatzeko helburuz.

Indarrean dauden pleguei dagokienez, informazioa jaso ez arren, jakin badakigu, ezarri ziren hizkuntz irizpideek ez zituztela ez hizkuntz eskubideak bermatzen ez eta 86/1997 dekretuak ezarritakoa betetzen.

Basauriko EH Bilduk hainbat batzordetan eta Norarekin izandako bileretan behin eta berriz eskatu du, plegu berriak kontrataziora atera aurretik, alderdi guztiei helarazteko. Udal arduradunen erantzuna beti baiezkoa izan da, konpromezu hori hartuz.

EH Bilduk, kontu honen egoeraren berri, azkenik, 2014ko lehenengo udalbatzan eskatu du, hau da urtarrilean.Eta bertan, gure sorpresarako, Euskara Arloko Zinegotziak erantzun zuen EH Bilduren ekarpenak ezin izan direla kontuan hartu, “plegua dagoeneko kontratazio fasean dagoelako”. Ondoren, plegu teknikoa helarazi digu, alderdien parte-hartzerik ere ez duena izan, proposamen lausoa eta 86/1997ko dekretuak ezarritakoak betetzen ez dituena.

Iker Casanova eta Pedro Pérez de Mendiola, Basauriko EH Bilduk antolatutako “Politika garai berrirako demokrazioa parte-hartzailea”ren gaineko I. Jardunaldietan esandakoak

Urt 27 2014

“Beharrezkoa da demokrazia parte-hartzailea indartzea, Euskal Herrian aldaketa soziala eta politikoa aktibatzeko”

Basauriko EH Bilduk antolatutako “Politika garai berrirako demokrazioa parte-hartzailea”ren gaineko I. jardunaldiek agerian utzi dute “demokrazia parte-hartzailea indartzeko behar gorria, Euskal Herrian aldaketa soziala eta politikoa aktibatzeko”.

130125Jardunaldiak13

Ekitaldian – Basozelaiko Gizartetxean egindakoa eta berrogeita hamar bat lagunek parte hartutakoa – Iker Casanovak, idazle eta politika analistak, eta Pedro Pérez de Mendiola, Basauriko elkarte mugimenduetako kideak, egin zuten hitzaldia.

Bertan, “demokrazia edukiz husten dabiltzala” azpimarratu zuen Iker Casanovak. Intentzioen artean ere, aipatu zituen “indibidualismoa eta elkarrenganako mesfidantza bultzatzeko, eskuin-muturreko antipolitika ezartzeko sistemaren asmoa, kolektiboa eta publikoa den edozeren prestigioa deuseztea, inibizioari, pasotismoari, pribatizazioari eta etsipenari bide eginez”.

Mehatxu hauen aurrean, Casanovak adierazi du “ezkerretik, demokrazia indartu eta aberastu behar dugu, parte-hartze zuzena eta delegatua indartuz, azken hau sakonki eraberritua, arautua eta fiskalizatua, zintzotasunez jokatzeko”.

Ildo beretik jarraituz, oinarrizkoa da “errotik etetea enpresari eta politikoen arteko harreman zitalak, kolektiboa aldarrikatzea, zerbitzu publikoen sistema defendatzea eta erabakitzeko eskubidea herritarrei hurbiltzea”. “Gu indignazio antolatua gara” erantsi du Ikerrek, gobernatzeko ardura duten EHBilduko ordezkarien lana txalotuz.

130125Jardunaldiak28

Beste aldetik, Pedro Pérez de Mendiolak azpimarratu du “gure jokabideak, ekintzak eta erabaki pertsonal eta kolektiboak funtsezkoak dira oraina aldatzeko”. Horregatik, Pedroren ustez, “lehenengo eta behin, geure bizitza pertsonal eta kolektiboa koherentziaz bizi behar dugu, eta berriro amets egin eta ilusioa piztu denon buru eta bihotzetan: langile, gazte, emakume intelektual, pentsionista, etab.”.

Pedro Pérez de Mendiolak bere hitzaldia osotzeko, lider iraultzaile batzuek esandakoak baliatu ditu. Adibidez, Rosa Luxemburgok zera adierazi zuen: “Mugitzen ez denak ez ditu kateak sentitzen”. Bertold Brechtek aipatutako batzuk eta baita fikzioko pertsonaia den Mafaldari irakurritakoa: “pentsatzen dutena esaten duten pertsonak gustuko ditut baina, are gehiago, esaten dutena egiten dituzten pertsonak”.